حكم و امثلة مغربية

مللِّي جلستْ أو هو يَحشِي لِي الهضرة غير بالفنْ

غير عمرْتْ مزيانْ أو علَّقْتْها لُو حلقة فْ الوْدْنْ

تْفَشِّيتْ حيتْ خوِيتْ المْزِيوْدة واللاّ إي كشْكشْ كِ الجنْ

بغى إي ردْ ليَّ صّرفْ..دوّرتْ رجلي وْيْدِّي أو درْتْ ڤنْ.. ڨنْ

01/12/2008إلهام



اللِّي شافُو مشحّمْ

إيقولْ شبعان لحم

أو هو منفوخ بالهمْ

01/12/2008إلهام



فْ اللسان كايْن السحورْ


ماشي فْ الحروزة والبخور

01/12/2008إلهام



شُوفُوا الراجل تابع المرا فْ خيالها

قاتلاه بالسحور غير بحلاوة لسانها

01/12/2008إلهام



ناكل بعدا فْ كرشِي ولا فْ كسوْتِي

نعطِي لْذاتِي حقْها وْ نزيدْ فْ قوْتِي

نبرّعْ راسِي بالأطباقْ وْ نحيّدْ شهوْتِي

نديرْ كسوْتِي فْ لسانِي وْندَوّقْ النّاس حلَوْتِي

الهضرة فيكْ فيكْ واخّا لبسْتِي وْزَوّقتِي

01/12/2008إلهام



عطي للرّاجلْ صبّاطْ دْ الجلدْ


و سبَرْدِيلا آخر ماركة للولدْ

ilham 30/11/2008



عطِي للرّاجل خبز الدار وْ لْحرِيرا


والعزرِي بَرْعُو بْ لْكاشِيرْ فْ كُومِيرا

ilham 30/11/2008



خلِّيوْنِي نديرْ ما بْغِيتْ أو عنْداكُم تْجَبْدُونِي


ما قادِّينْشْ علْيّ.. واشْ أنا قلت لكمْ وَلْدونِي؟

ilham 30/11/2008



كايْ تْلاقى صحابُو غْيرْ فْ الأنْتِرْنِيتْ


أو عايْشْ غير بْ السّانْدْوِيتْشْ أو لْفْرِيتْ

ilham 30/11/2008






عطيني صحتك أو هاك فلوسِي


عطيني راحتك وْ نزيدكْ ضروسِي



ilham 29/11/2008





الدِّيتْ على الحزن والحزن الدّا عليّ

أنا نتْسنّطْ ليه أو هو إي رارِي بِيّ

ilham 29/11/2008



واخّا تحفر وْ تحكْ على الدّبْرَا حكّا

مانا مَدْوْزْ..لا طريقْ ولا سكّا

مانا شِيشا..لا طفّاية ولا دكّا

ما نعطيكْ كلمة واخّا تحَكْنِي بْ المْحَكّا



ilham 29/11/2008



كْلا الخوخْ وْ ضحكْ على راسُو المثقوبْ


مللِّي كاتْشبْعْ الكرشْ كات فيّقْ اللسان للدنُوبْ

ilham 29/11/2008



اغْسلْ الكلامْ مزيانْ أو ضبْغُو

ما تْنشْرُو حتى تْنشرو وْتْصبْغُو

ilham 29/11/2008



تنشْرُو الأولى أقصد بها النشر في الصحف

وتنشرو الثانية أقصد بها نشر الغسيل

ilham 29/11/2008



مول الشَّعْر ديما ملْهِي كايْ مشطْ

والقرع إلى خطاوْهْ الفلوسْ كايْ قنطْ




مول الشعر أقصد مول الفلوس ديما ملهي كايْحسبْ

القرع أقصد به المسكين اللِّي ما عندو فلوس

ilham 29/11/2008




الإنسان المزيان ضحكتُو نقيّة أو مضبُوغة

والخبيتْ ضحكتُو بْخْنْزها مصبوغة



والخبيتْ ضحكتُو بْخْنْزها مصبوغة أقصد ….الضحكة الصفرة

ilham 29/11/2008



الجدبة خاصها ناسها

القصارة خاصها لباسها

والزردة خاصها ضراسها

ilham 29/11/2008



ديرْ القوامْ إلى بْغِيتِي الماكلة تجِي بْنِينة

مابْقاتْشْ فْ الطبلة مزوْقة والرِّيحة فْالكوزِينة

ilham 29/11/2008



شحال أو هو يْ دِيرْ الخيرْ

نهارْ عيَى..قالوا عليهْ حقيرْ

ilham 29/11/2008



معفّرْ عل الخُبْزة الباردة دابا تشْتاقْها


كونْ زرعْتِيها،حصدْتِيها وْ عجنْتِيها تتلدَّدْ مذاقْها

ilham 29/11/2008



الباردة أقصد بها

أولا:ضد السخونة

ثانيا: السهلة

مثلا

كما نقول:جاتْ باردة حتى لْ عندُو ما تْعدّبْ ما تْمحّنْ

ilham 29/11/2008



بقِيتْ تابْعة..تابعة الشُّوّافة


واللِّيتْ للناس ضحكة وخرافة

مول دارِي هربْ.. ضرباتْلُو تالَفَة

كلاتْ فلُوسِي أو رماتنِي فْ الحافة

ilham 29/11/2008



ماحَدُّو صغِيرْ شْرِيلُو غيرْ لْ حليبْ أو لهّاية


ملِّي يْكْبْرْ خاصّو بُورتابْلْ،سْبَرْدِيلا أو طَفّاية

ilham 29/11/2008



عنداكْ تتبعْ غير ملدّاتْ الدنيا كلها

واحد النهارْ تْسدْ عِينْكْ أو ما تْحُلْها

ilham 29/11/2008



اللِّي حاجْتُو فيكْ


أنت تهرب منُّو


أو هو لاصقْ فيك

اللِّي حاجتُو بيكْ

تعيى ما تعايْرُو

أو هو يشْكر فيكْ

تكحّلْ عليه بالعمى

هو بالضحك إي كحّل ليه

تخوي وْتهرب من داركْ

أو هو الصّالون معمّر ليكْ

تولِّي بالأعصاب تشطحْ

أو هو فرحان إي طبّل ليكْ

ilham 29/11/2008



المنكر كايْ فرّشْ لك الضحك والآداب والصوابْ


تولِّي مدخلُو لْلصالونْ فْ عوطْ تخرجُو مع الباب

ilham 29/11/2008



العنْبَة مع الوقت ك تولِّي زبِيبة


والزبيبة عمرّها ما ترجع عنْبَة

إلى مشى الشباب والصحة الحبيبة

مايْنفْعُوكْ صحابْ وْتْوَسّدْ العتبة

ilham 29/11/2008



كولْ غيرْ من الحْلال

تعِيشْ مرتاح البالْ

واخا تولِّي عامر مالْ

ما ترجعْ صحة ولا جمالْ

ما تشري حب،ولا العمر يْطْوال

ilham 29/11/2008



اغْسلْ النُّقرة واخّا قديمة ترجعْ تشْعلْ

الوردة الجميلة شحال ما عاشْتْ تدْبلْ

أو جمالْ الرّوحْ وْ صفاها عمرُو ما يْرحلْ

ilham 29/11/2008



اختارْ المْرا العاقلة،الذكية،حلوة اللسان وْ الفحْلة

إلى كانْ غِير على العِينين و السّالفْ راهُم عند البغلة

ilham 29/11/2008



اللّهّايَة أوْ السّكّاتة كاتْسكّتْ التْرَابِي

وْ البُورتابْلْ كايْ لاهِي وِالتلّفْ الدْرارِي

ilham 29/11/2008



اخْتار الكلامْ الزوينْ..عادْ حطُّو فْ لسانكْ


ماتْمَضْغُو،ماتْهَرْسُو أُوما تْكَنْززْ علِيه أسنانْكْ

توَلِّي مولْ الكلمة الموزونة و الحكمة فْ زمانكْ

ilham 29/11/2008



أنا ندْوِي بالمعنى

وْنتَ كاتْفرّشْ كلامِي

أنا نخبِّي المحنة

وْنتَ كا تْلوّنْ غيامِي

ilham 29/11/2008

****

كاينة الهضرة اللِّي مْتَوْلة وْ فصيحة


واخّا طويلة كا تْفتنْ إلى كانت صحيحة

كايْنة اللِّي واخّا قليلة تْمرّضْ وْ الدِّيرْ الفضيحة

مللِّي كاتْقاضى كا يْبْقى خنْزْها طالقْ الرِّيحة

ilham 29/10/2008

**

كاينة الهضرة اللِّي فيها الطّبالة وْ الغيّاطة

كاينة اللي مشَتْتَة،مفَرْتْتة بحال الشياطة

ilham 10/11/2008

***

الكَلسة عل البيضْ كاتْخرّجْ الدجاجْ

والكلسة عل الفلوس كا تقْتل المحتاجْ

الله قادر إي طيّرهمْ بنفخة من العجاج

ilham 10/11/2008

***

شحال أو هي تحلم بأيْ راجل تتزوّجْ

ملِّي لقاتُو..واللاّتْ تتشرّطْ أو فيه تْعوّجْ

ilham 10/11/2008

**

اضحك.. لعبْ وْبقى بْقيمتكْ

لايْ جَرُّوا وْتادْكْ أو الطِّيح خيمتكْ

ilham 10/11/2008

***

غيرْ بانُو سناني أو هو بْدى يْحْسبْهُمْ

هرْبُوا..أو غطّاوْهُمْ شوارْبِي لا يْ هرّسْهُمْ

ilham 10/11/2008



***

شافنِي ضاحكة..فُمِّي بالمعْيورْ سدُّو لِي

بغيتْ نْفرْحو وْ نْفَوّجْ عليهْ..ساعا هجْرُو لِي


ilham 10/11/2008

****

الّلهُمّ نضحكْ مع راسي

واللاّ نوَلِّي ضحكة بينْ الريُوسْ

غيرْ كانْ بيّنْ ضراسِي

كا يْتْسَتْفُوا لْ يدِّينْ علْ الفلوسْ


ilham 10/11/2008

http://R255682.copyrightfrance.com

***

***


يا عيون الدنيا الضاحكة


ضاحكة معايا


واللاّ عليّ ضاحكة


ilham 10/11/2008

****

كل فم ف الدنيا خاصُّو يرضعْ

كل عينْ شافتْ النور خاصها تتمتّعْ

بنادمْ طامعْ عمرو ما يْشبعْ

***

إيه علْ الوقت وْاللِّي ثيقْ بيها


طارت..مشاتْ بلاما نحسْ بيها

بقيتْ تابْعاها حتى غرقت فيها

إيه علْ الوقت وْاللِّي ثيقْ بيها

مشات الضحكة مع المّاليها

واللاّ الحزن والغضبْ دايرين بيها

ilham 08/11/2008

****

هو يْضرب الطّرْ


وانا نضرب البنديرْ

هو يزْرع الشّرْ

وانا نزرع الخير

هو فْ دموعي يْجُرْ

وانا عليه نْغِيرْ

هو فْ قلبِي يْعْكَرْ

وانا فْ الحب نطير

ilham 08/11/2008

***

شحال أو هو يرغبْ وِي زاوكْ فِيَّ


سمحتْ لو علْ اللِّي مادارْ فِيَّ

رجعتْ لْ داري وْ مسحت عينِييّ

جاب صحابو يْ قصْرُوا بالسيفْ عليَّ

دوّزْتْ اللِّيلة فْ الشقَا واقفة على رجلِيَّ

ظنِّيتُو تابْ..السّاعا جابنِي يْتكرفسْ علِيّ



إلهام شريفة بُصَفَا16/06/2008

****

الماكلة اللذيذة هي اللِّي بلا همْ

واخّا غير مرْقَة بلا دجاج ولا لحم



إلهام شريفة بُصَفَا16/06/2008

***
حطْ لي الماكلة أشكال أو ألْوان

أو عاملني بحالْ الفقير بالإحسانْ

كايْ قولِّي..كولْ وْتمتّعْ مزيانْ

وقفاتْ لي الدّغمة واخّا كنت جيعانْ

إلهام شريفة بُصَفَا16/06/2008

***
إوَا فهمْ راسكْ..ديرْ النفسْ أو عيقْ

أنت من طريقْ وانا من طريقْ

ما باغا نتبْعكْ ولا نْعاوْدْ فيكْ نْثيقْ

إلهام شريفة بُصَفَا16/06/2008

*****

المرا الجميلة هي اللي من الذاخل عسل حُرّة

ماشي اللي تفتن أو من الذاخل خبِيتة أو مُرّة




20/08/2


إلهام شريفة بُصَفَا16/06/2008

خلِّي الكذّابْ إيعُومْ فْ كْذوبُو

دابا يْغرقْ فْ جلايْلُو وْذْنُوبُو

10/09/2008إلهام

*****

اخرُجْ يا سكاتِي

ماحدْ بزُّولة الملحة عاطفة

ماحدْ شهدة السّرْ نازفة

اخرج وْ اذخلْ ف الهمْ

اذْخُلْ فيه صحّة

ماحَدّْكْ بالصحة

أو نشَّشْ عظامُو

بالصحة وْ الرّاحة

10/09/2008إلهام

****

المخْ إلى طار مايْرجع لْراسُو

إلهام 10/09/2008

*****

السكات بزافْ


والهضرة احسنْ

السكاتْ مطمورة

عامرة هم

السكاتْ إلى اكْثرْ

إي طلّعْ الدمْ

إي دكّنْ الرْكانِي

من كثرة الغمْ



30/06/2008إلهام

*****

مْلِّي كانْجِي لْدارِي كانْلْقاهْ سبَقْنِي


سلّفْتُو الفلوسْ باشْ يْهربْ وِفْرَقْنِي

إلهام 16/10/2008

إلى كان صاحبكْ عزيزْ عليكْ ويّاكْ تْسلْفُو الفلوس


إلهام 16/ 10/2008

إلى بْغِيتي تتْهنّى من شِي إنسان. .سلْفُو الفلوسْ


إلهام 16/10/2008

غيرْ تْسلّفْ الفلوسْ

تولِّي عدُو أو منحوسْ


إلهام 16/10/2008

****

*****

ضربْها بنعْسة قبل ما ضربك الفيقة


يْ ولِّي راسكْ يْضرب منْ ضربة الشْقِيقة

11/11/2008إلهام

بْالزعامة بغَى يْدُورْ فِيّ


وانا نقطع عليه الطريقْ

سدِّيتْ عليه بْشْوِيَّ

أُو خلِّيتُو يْ دورْ فْ الدِّيقْ

11/11/2008إلهام



قالُوا زمان

كولْ أو وكّلْ

زادْتْ إلهام

والآجرْ شكّلْ

ما تْفْضحْ ما تْعكّلْ

11/11/2008إلهام

الحوتة إلى ما كانتْ المّاجْ فاشْ تعتْرْ

عمرها ما تعيشْ إلاّ فْ الوادْ أو البحرْ

***

بنادْمْ الحُرْ أو ولدْ العزْ

ما تغمزُو ولا فيه تْنْغزْ

11/11/2008إلهام

خلِّيت على دارِي أو مشيتْ نفكْ الجرّة

ملِّي رجعتْ لقيتْ الرّاجلْ جابْ الدّرّة

11/11/2008إلهام

علِّيتْ كلامي أو درتْ لو القيمة وْ العزْ

أُو نقِّيتْ الحروفْ من السوسة و الخزْ

11/11/2008إلهام

طرّقتْ لسانِي بالمسامرْ قبل ما يْصَدِّي

وْالطِّيحْ قيمتِي فْ الأرض ونْولِّي نْعدِّي

11/11/2008إلهام

اللهمّ الغرق فْ النعاس ولا الغرق فالهمْ


بعدا النعاسْ إي ريّحْ والثاني يْ طلّعْ الدّمْ

11/11/2008إلهام


هما وصْلُو من مُورايا


وانا من التليفون لْمْرايا

وْنْشيّكْ وْنْزيّزْ فْ جوايا

11/11/2008إلهام


إلى طابْ نْعاسْكْ حطُّو علْ المخدّة


إلى فوّتِّي طيابُو..تبقى فايْقْ لْغْدّا

11/11/2008إلهام


غير تْجِيكْ النعسة ضربْها

تمتّعْ بالراحة عوم فيها أو شربْها

11/11/2008إلهام

إلى مشاتْ حتى ضرباتكْ الفِيقَة

واخّا غير لحظة أوْ دقيقة

تْباتْ تتقلّبْ تقولْ فيكْ الدِّيقة

11/11/2008إلهام

كثرة التخمام…المستقبل كايْ عوّرْ


نوضْ تحرّكْ..أو دوّرْ الحركة دوّرْ

غيرْ ديرْ القفّالْ وْ طعامكْ إي فوّرْ

11/11/2008إلهام

مايْجِي نعاسي فينْ إي طيبْ

حتى يْطِيبْ العنبْ وِ ولِّي زبِيبْ

***

راكْ الدّوّرْ الحركة..الدّوّرْ

إلى كنتِ قافْزْ أو مطَوّرْ

11/11/2008إلهام

قالوا


واشْ تكونْ يا الظّالم

ذاخل علينا هاجْمْ

جاوبهمْ

أنا ولدْ خالتِي حاكمْ

11/11/2008إلهام

دقْ لِي مسمارْ جحا

وانا نعلقُو فيه

طحنْتُو طحنة الرْحَى

والمسمار كل ساعة نْدقُّو فيه

11/11/2008إلهام

كان حاسبْ راسُو دودة كا تصنع لْحريرْ

فصّلتُو بشْهوتِي وْ لبَسْتُو بالفنْ وْالتفكيرْ

11/11/2008إلهام



غيرْ ندْوِي إِي قطّعْ هضرْتِي بالسمنْ وْ العسلْ

أنا نْخرّجْ الكلمة أو هو يْ قطّعْ فيها وِ فصّلْ

11/11/2008إلهام

بغى ياكُلْ وِ يْغْسلْ فِيّ يْدُّو

لحتُو بْحوايْجُو أو بدِيتْ نْعَضُّو

11/11/2008إلهام

الهمْ إلى كثرْ خرْجُو باشْ تخْفافْ

لايْ ولِّي مرض وِيْ طيّحْ لك الكتافْ


11/11/2008إلهام

النعسة خاصها فراشْها

والماكلة خاصها ضراسْها


11/11/2008إلهام

ما تخرّجْ الهضرة حتى تشَكّلها وْ تعَرّبْها

أو ما طيّبْ النّصيحة وْتوكّلها حتى تْجرّبْها


11/11/2008إلهام

ما خلِّيتْلوشْ فين إي عضْ


وْلا درتْ طريقْ للدموع عل الخدْ

عْيَى مايْعايْرْ وِ يْتْمنّى الرّدْ

تْبسّمْتْ فْ وجهُو بحال الوردْ

واللاّ يْجْدبْ..يْتْعذّبْ وِيْتْغدّدْ

عطِيتُو النخّالْ أو ما لْقى فاشْ إي شدْ

احدْرْ الرّاسْ وْدْموعو عمرُوا سدْ

حكم وأمثال إلهام مغربية شعبية

حكم وأمثال العصر


جديدة 2007-2008

11/11/2008إلهام

*****

ياغْلافْ الذَّاتْ

ياغْلافْ الذَّاتْ…ياضامْسْ العْقُولْ

تْخَلِّي المْشْيَّكْ بْ قِيمة أو لْبْسيطْ مهبولْ

المْزَيَّزْ يْرْكَبْ ضْهُورْهُمْ والعادي مدلولْ

إي وْاللِّي المْشَيَّكْ جْميلْ وْ الثاني يْشْبهْ الغُولْ

ياغْلافْ الذَّاتْ…ياضامْسْ العْقُولْ

كيفْ تْعَشْقُوا الغْلافْ…واشْ هذا معقُولْ؟



15/04/2008إلهام

زواجْها واقف على رجْليهْ


حيت راجْلها جالس عل الفلوس

22/09/2008إلهام


حكمْتْ على نفْسي وْ ذاتي فْ حبْسْ اللباسْ


حبَسْتْ نفسي بنفسي باشْ نْبان قُدّام النّاسْ

23/09/2008إلهام شريفة بُصَفَا

ملِّي تجلس أو هي فْ الماكلة وْ النّابْ تْهرد


إلى حطِّيتِيها علْ الدّبْرا تْقَيّحْ وْ تزيدْ تمرضْ

23/09/2008إلهام

قالوا :الصحة أحسن من الفلوس


واش تفيد الصحة بلا فلوس؟

23/09/2008إلهام

هذا عصر بِيبِّي عليَّ

نْ بيبِّي عليكْ

عصر الوحْدانِيّة

الله إي نجِّيكْ

عصر دَرّقْنِي بْ خيطْ

نْ درقكْ بْ حيطْ

عصر نْقصّرْ معاكْ من بعيدْ

مانْ هَضْرَكْشْ إلى كنتِ قريبْ

نْسْتْحْلاوْا القصارة وْ الحْدِيثْ

غير فْ التليفون وْ أنْتِرْنِيتْ


23/09/2008إلهام

غير وقفْ على رجْلِيه

جلّسْنِي عَلْ الضَّسْ

غير تحلُّوا ليه البِيبانْ

خرجْنِي مع البابْ

غِير علاوْا كتافُو

طيّحْ لِي كتافي

كنت مرا

أو مرمورة

واللِّيتْ عرّا

أو مقْهورة

كنت مرا

وْ نصْ

واليوم طاح لِي النّصْ

23/09/2008إلهام

شكون الظّالم؟


شكون المظلوم؟

شكون الحاكم؟

شكون المحكوم؟

كُلاّ يْحلفْ وِقسّمْ

ما خاف الله ولا خمّمْ

شكون تصدّقْ؟

كيفْ تحقّقّ؟

طامعِين فاليوم

أو ناسيِينْ غدّا

يا هذْ القومْ

فكْرُوا فْ غدّا

27/09/2008إلهام



مادار بْوجه الوالدين


ولا بوجه الدين


حيت ماعندو وجه


ما تعرف من وجهو من قفاه

27/09/2008إلهام

يْبْنِي الديُورْ من الرملة

وِ فرّقْ فيهُمْ بالجّمْلة

10/09/2008إلهام

خلِّي داكْ الرّاس ناعس أو مْغَطِّي

ماعرفوه كْحَلْ،أبيض ولاّ مْسطِّي

10/09/2008إلهام

خلِّي راسكْ ديما مستُور

ماعرفوهْ شبعان ولاّ مقهورْ

10/09/2008إلهام

كل واحد عطيه الهضرة اللِّي تْناسْبُو

لا تْوَلِّيوْا قُدَّامْ الجِيران تتحاسبُو

10/09/2008إلهام

*****

بْ عينِي عْبَرْتْ

أو بْلْساني وزَنْتْ

دَرتْ حسابِي

باشْ ما نْتْحاسبْ

الدِّيت الهضرة

أو جبْتْها

سرَّحتْها

طَيَّبْتْها

ذخلتْ فيها أو خرجت

وْاللاّتْ ناضجة

خفيفة

أو موزونة

علّقْتْها لوْحَة فنِّية

على لساني



10/09/2008إلهام


ملِّي جْلسات أو هي تبكي أو تشكي علِيَّ


حتى مابْقيتْ نعْرفْ من راسي من رجْلِيَّ

27/09/2008إلهام

واللاّتْ غادا وْ الطِّيحْ


على سْبّا وْ على الرِّيحْ

على والو عينها تْسيحْ

أما لسانها مازال صحيحْ

فْ حْشيان الهضرة فْصيحْ

27/09/2008إلهام


يا الطّالع فْ العقبة٠٠ سير غير بْشْوِيّة

دابا تْزلق ف الحدورة٠٠زلقة العمر قوية

يا الطالع ف العقبة٠٠٠والعقبة خاصْها التّخمامْ

حلْ عينْكْ ف الحجر و الشوك أو فيق من الأحلام

زلقة الحدورة الطَّيْحْكْ كِ الحجرة ف ماء الدوامْ

بعد العيى،العطش و الجوع يبطل لك الصيامْ




10/09/2008إلهام

الهم شدْ فِيّ بحال صحاب البَلْيَة

10/09/2008إلهام

الزين مافيه لا طويل ولا قصير

الزين هو اللي قلبُو ولسانو حريرْ

2008إلهام


الزين ما فيه لا غليض ولا رقيقْ

الزين فيه تِساع الخاطر ماشي الدِّيقْ

إلهام 2008

التبرْكِيكْ الصحيحْ

***

إلى قالولك مراتك غليظة أو عايبة

جاوبهم

أنا عزيز عليَّ الكرموسة المعسلة الطايبة

غير الذُّوقها الدوب أو حلاوتها دايبة

مايهمش تكون