في الحب و الغرام

قصة نهادْ أو عِمادْ

***

يا عُشَّاقْ….يا أهلْ هذْ البْلادْ

جِيتْ نَحْكِي لكُمْ قصة الغزالة نُهادْ

اللِّي حْبَّاتْ حُبْ بْجْنُونْ حْبيبْها عِمادْ

من أجْلُو تْحرماتْ من الزواجْ والأولادْ

كانتْ تْبكِي ليلْ وْ نهارْ حثى فاضْ الوادْ

تالفة مسكِينة تْردَّدْ شعر حبيبها عِمادْ

شِعْر تْقُولو وْ تْغَنِّيه اللي كان هو الزَّادْ

بفظْلْ دمُوعها عمْ الخير ف البلاد

واللاَّتْ تايْهة من حومة لْ حومة

تبكي حبيبها بلا عيبْ ولا حشومة

بْصوتْ عالي تْرَدَّدْ أشْعارُوا المردومة

اللي رجْمُوه بحال الشيطان

رجموا عماد العاشق الولهان

نْفاجْرْتْ بالحزن علِيه انْفِجارْ البركان

ذَنْبُو أَنُّو كانْ يْ قُولْ شعر فْ نُهادْ

كان إي قُولو قُدَّام كل العباد

ماتْتْ أحْلامها أوآمالْها بْمُوتْ حْبِيبْها

بْكثرة بْكاها عْلِيه طْفا نورْ عِينْها

مللِّي تْعْطْشْ كانْتْ تْشْرْبْ دمُوعْها

الدموعْ كانتْ تَسْقِيها أو تخفَّفْ جوعْها

حتى وْاللاَّ المرضْ إنَشَّشْ ظلوعْها

بقاتْ عْلى هذْ الحالْ حتَّى غابْ طْلُوعْها

قصْتْنا بْقاتْ عْلى جنْبْ الوادْ

واللاَّتْ شجرة إي زُروها الجْوادْ

شجرة أغصانها سوالف الجميلة نهاد

شجرة العاكْرة اللِّي تْتْرْجَّى الأوْلادْ

شجرة الحب واللي يْتْمْنَّى إينالْ المُرادْ

شجرة الحبيبة والحبيب عماد أو نهاد

إلهام15/04/2008

***

ليلى يا ثوْأمْ روحْ قيْسْ

****

…ليلى…ليلى…ليلى…ليلى…

ياشجْرة عالْية بْ اغْصانْ مايْلة

اغْصانْ تْتْراقْصْ كِ دْمُوعْكْ السَّايلة

دْمُوعْ عْسْلْها حُرَّة…صافية..حايْلَة

ياهْوا رُوحِي وْ دْوا جْرُوحي الطَّايْلة

فِينكْ يالَيْلى..يانَسْمة على وجْه حْزينْ

يابسمة غالية بْصمتْ هادي وْحْنِينْ

بَسْمة تْحْفَرْ خَدّْكْ يالَيْلى..بْحُفْرة الزِّينْ

يارِيتْ نْسْكُنْ فِيها أو نْمسحْ لك دموع العينْ

يامالْكة روحي وْ قلْبي…ياليلى..ليلى

يالَمْسة…همسة…نغْمة وْ عْذوبة هْوايا

قَلْبي بِينْ قُضبانْ الظلوعْ عَطْشانْ يا مايَا

يْحْلْمْ بِيكْ ياليلى…وِ يْتْقَطَّعْ وَسْطْ جْوايا

…ليلى…ليلى…ليلى…ليلى…

ياشجْرة عالْية بْ اغْصانْ مايْلة

فِينْ ظِلّكْ اللِّي كانْ حامينِي من الزّمانْ

اللِّي كانْ إيبَرَّدْ نارْ قلبي العاشقْ الولْهانْ

تحثْ اغْصانْكْ يارُوحِي..كُنتْ في أمانْ

نْقَشْتْ إسْمْكْ يالَيْلى بْ عْروقِي فْ الوجدان

ثَمْرْكْ…ثَغْرْكْ…ثَغْركْ…ثمرْكْ… ياأحلى ثَمْرْ

الحروفْ تخْرْجْ مْسلْسْلة…مْلحْنة من أجمل ثْغْرْ

العيونْ سبحان الخالقْ…شاعْلة أوْ زانْدة بْحالْ الجَمْرْ

حرمُونِي من ليلى…بْنتْ عمِّي

حرْمُونِي من هوا نفسي أو دَمِّي

حرمُونِي من اللِّي كانتْ تْمسحْ همِّي

…ليلى…ليلى…ليلى…ليلى…يا حُرِية

ياشجرة تْحْرْقاتْ فْ صَحْرا ذاتِي المَجْلِية

يا اغصانْ رْشاتْ عْلى رمالْ روحي المنْسية

…ليلى…ليلى…ليلى…ليلى…يا حُرِية

ماتْ قيسْ يْبْكِي ليلى أو بْقاتْ أشْعاروا الرومانْسِيَّة

****

قلبِي كايْ شُوفكْ ديما ماشي بحال عينِي

يوم تغيبْ علِيّ..نبْقى مغَمضة عِينِي

خايفة يعْمى قلبِي ما خايفة على عيني

ilham 04/01/2009

**

دابْ بحر قلبِي وْ تْبخّرْ

لْ سما عينِي يحكِي مأثّرْ

حزنتْ عليه وْبداتْ تمطرْ

ilham 04/01/2009

***

****

الحب أصلو حلاوة

شحال من زوج حطم الحب االلي بينو أو بين مراتو

تتمنّاه إموتْ أو هو حاسبها تخاف عليه وعلى حياتو

يْدْفلْ،يضرب،يشتم،هي ديالو حيت ف الكاغط مراتو

هي تنقِّي،تْغدِّي،تربِّي ولادها أو صابرة على غواتو

الحب أصلو حلاوة أو طيبوبة يتربع ف القلب بْ صَفْعاتُو

الحب يتسنط للمحبْ ب وجدانو،بروحو ماشي لْ شهواتُو

إ ولِّي القلب يعزف للوجدان،طاير ف عالم الحب بْ لُغاتُو

15/06/2008

الحب الممنوع

**

دق الحب باب يامنة

سمعات للدقات

أو ما فتحت الباب

حب خوّفْ يامنة

حب ممنوع على يامنة

حب محرم على يامنة

سمعات للدقات

نظراتها تخطفات

إرتجفات

عرقات..

قالت لا…لا

أنا يامنة

مرت الراجل

أنا أم

أنا شجرة ولادي

خاصني نبقى واقفة

لظلم راجلي

لحكرة راجلي

لعنف راجلي

لعبودية الخوف من راجلي

أنا الشجرة لولادي

أنا الظل اللي يْحْميهم

من ظلم الأيام

بحال ظلم البّاهم ليَّ

من حكرة الزمان

اللي حكْرني

أو لاحني فْ يد حكّار

من قهرة الزمان

اللي خلاّني نكره الدنيا

نكره بُو ولادِي

اللي داس على كرامتي

اللي حكم عليّ بالسكات

مان عارضو

مان جاوبو

عندي الحق ف كلمة

نعام…

واخّا…

هي اللّولة…

ما يكون غير خاطرك

أنا شجرة ولادي

خاصني نبقى واقفة

لأولادي…للكبدة

آه…آه…عل الكبدة

رجع دق الحب باب قلب يامنة

ما فتحات

بكات…بكاتْ

أو فالحب غرقات

أنا يامنة مرت الراجل

اللي خطف حبي ليه بعروقو

أو عمر قلبي بالكره

لا

أنا يامنة

الممنوعة للحب

أنا يامنة اللي ماتعرفش تحب

أنا

مرت الراجل

أنا

بنت الآصل

حرام نحب

لا…لا

توقّفْ ياقلبي

رجع لدقّاتك

رجع لصوابك

فكر غير ف ولادك

واللى الحب يدق

وِدق…دق

وْ تصدُّو يامنة

الممنوعة للحب

17/05/2008

****

أميرة الدموع

قلبي ياناس بالغرام َموْلُوع

ماهو مْكْري للنْزاهَة ولامَبْيُوع

يْتْقَطَّعْ مسكين فْ حبْسْ الضلوع

بابوُ كُلُّو قُضْبان أوممنوع

بالغرامْ فْ السما ياناس مَرْفُوع

ماغْرَّاتُو شمس ولاشموع

تْبْعاتُو العينْ بْحْبالْ الدْموع

علْ الحْبيب تْسايْنْ الرْجُوع

طَلْعَتْ فيها اليَدْ في خُشُوع

لْعَنْدْ العَيْنْ أميرة الدموع

اليَدْ تَقْطَعْ وْتْزِيدْ فْ الحْبال

العَيْن زادْتْ فْ البْكا أولْهْبَال

وْاللاَّوْا الخْدود حالْهُم حال

عْليهُم شْلاَّلاَتْ كِ الجْبال

boussafa charifa ilham 28/02/2006

إلهام شريفة بُصَفا

***

***

جيتْكْ تْشارْكِينِي حْياتِي

جيتْكْ تْشارْكِينِي حْياتِي..راني قَصْدِي شْرِيفْ

جِيتْكْ طالْبْ راغْبْ…بْخاطْرْكْ ماشِي بْالسِّيفْ

لاَتْسْدِّي عْلِيَّ بابْكْ وْالنْبِي ْوصَّا عل الضِّيفْ

نْهْدِيكْ قَلْبِي الغَنِيْ اللِّي يْ ضَلْ يْقاوْمْ الخْريفْ

قلبي اللي يْهْواكْ فِيهْ فصل الشْتا أوفصل الصيفْ

سامْحِينِي يا العزيزة عْلى الجِّيبْ الرَّاشِي الضْعِيفْ

جيتْكْ تْشارْكِينِي حْياتِي..وْالله قَصْدِي شْرِيفْ

جِيتْكْ طالْبْ راغْبْ…بْخاطْرْكْ ماشِي بْالسِّيفْ

فْتْحِي قَلْبْكْ أو سَكْنِي قَلْبِي المولوعْ الرْهِيفْ

سامْحِينِي يالْحْبِيبَة …هذا جْهْدِي وْعْلاشْ قْدِّيتْ

سْبْحْتْ فْ المَّاجْ الزمانْ…وْعلى امِّي ضَحِّيتْ

شْحالْ مْنْ مْرَّة غْرْقْتْ وْ عْلى الخُّوتِي ماتْخَلِّيتْ

جِيتْكْ بَعْدْ ماكَبْرُوا أُو الواجبْ اللِّي عْلِيَّ أَدِّيتْ

جِيتْكْ تْرَحْمِينِي أُو تَهْدِيلِي قَلْبْكْ اللِّي حَبِّيتْ

اللي طُولْ السنين وانا فْ العذابْ وْعْلِيه ماتْخَلِّيتْ

boussafa charifa ilham26/04/2008

5 Réponses à “الحب

زائر

tbarek llah 3lik

9rit o 3awedt

machbe3tch
had chi raw3a affraid

» معنى الحب عند رسول الله (ص)
» معنى الحب عند رسول الله